کوچه
گئجه آی چیخمیشیدی
بیرمنیدیم بیرده او کئچمیش کوچه‌لر
بیرده تمام خاطیره‌لر منله برابر
گینه غملر اورگیمده قالانیردی
گینه سنلن او کئچن خاطیره‌لر یاده دوشوردو
او گؤزل خاطیره لر آیدینا گلدیکجه گؤزومده
آلیشیب اوددا یانیردیم
دانیشیردیم آییلا ، اولدوزايله ، چایلا ، چمنله
آی او گونلر کی گزیردیک بو داریش کوچه ده سنله
آیاغیم کوچه یه چاتدیقجا اورک دردینی دئشدی
اوتوروب سئیر ائله دیم خاطیره لرده ؛
گؤزیاشیم خاطیره لر تابلوسینا باخدی تؤکولدو
سئل کیمی آخدی تؤکولدو
او گؤزل گونلریمیز یادیما دوشدو
سنی آختاردی گؤزوم پنجره لرده
سونرا ایتگین ایتیرنلر کیمی قاشدی
او زامان سن دولانان یئرلره باخدی
آمما بوش یئرله ساتاشدی
یئنه غم کاسه سی کؤنلومده جالاندی
یئنه کؤنلوم یارالاندی
نه گؤزل گونلریمیز سنله واریدی او صفالی کوچه ده
حیف او سئودا ، او محبت بئله نیسگیللی قورتولدو
نئجه تئز عشقیمیزین یاسی دوتولدو
نئجه تئز خوش گونون عومرو سونا گلدی
نه بیلیردیک؟ بئله دووران دؤنه‌جکمیش
نه بیلیردیک؟ کی بوتون آرزولار ایمکان اولا بیلمز
نه بیلیردیک؟ یانار اودلار سؤنه جکمیش
حیف اولدو، او گؤزل خاطیره لر دؤندو غم اولدو
نه گؤزل فیکرو خیالیله یاشاردیق
گله جک گونلریمیزدن سؤز آچاندا
بوروشوردوک گولیله ، چایلا ، چمنله
آرزولارلا قاریشاردیق ، ساواشاردیق ، باریشاردیق
نه گؤزل دیر بیری نین کؤنلونو آلماق
قولونو سئوگیلینین بوینونا سالماق
سارماشیقلار کیمی شوقیله ساریشماق نه گؤزل دیر
هردن هردن اوتوروب فیکره دولاندا
او عزیز خاطیره لر یاده دوشرلر
گؤزو یاشلی یاغاجاق بارلی بولودلار کیمی دوللام
دییه رم هئچ گؤره سن بیر دوشه رم یادینا منده
گول آچار سنله کئچن گونلریمین یادی سینمده
شوقیدن گوللریم ایستر کی آچیلسین
آچمامیشدان ولی سوللام
نه دئییم کی منه گول وئرمه لرین یاده دوشنده ده لی اوللام
اوتوروب آغلاشارام خاطیره لر له
نئیله مک سن بئله سئودین
منده سن سیز یاشارام خاطیره لرله
من دئییردیم کی محبت گولونون رنگی سولانماز
نه بیلیردیم کی سولارمیش
نه بیلیردیم کی فلک بئیله قویارمیش
منی سن سیز سنی من سیز
خسته کؤنلوم گینه سن سیز نئجه حسرتلی سیزیلدار
کاش بیلیدین بو سینیق سازدا نه لر وار
آمما سن هاردان بيلرسن
بیر مثل واردی دئیه رلر کی اورک یانسا گؤز آغلار
سنین آمما اورگین وارسادا داشداندی ، دمیردندی نه داشدان
کیم گؤروب؟ گول گویه‌ره سولموش آغاجدان
بسله میشدیم سنه بیر شانلی محبت
کؤنلومون آیناسی آمما داشا گلدی
شوشه تک پول پول اولوب دوشدو داغیلدی
باشلادی سولماغا گول‌لر
بختیمین ترلانی دا اوچدو باغیمدان
کؤچه‌ری قوشلاریله گئتدی قوتولدو
بیلمه دیم؟ هاردا دوتولدو
ائله بیر اینجه کؤنول صاحیبی آنجاق کی من ایدیم
ائله بیر قاینار اورک کی اؤزو سیندی
سنی سیندیرماق اوچون اولمادی مئیلی
سنده سئودین قالا یالقوز ـ قالا حسرتلی گیلئی لی
نه بیلیردیم؟ بئله سئومک ده اولارمیش
نه بیلیردیم ؟ کی محبت گولونون رنگی سولارمیش
نه ببیلیردیم ؟ نه بیلیردیم ؟
ياشيل سوزلر
كوچه1
ع.آيرملو(وفا)
گئجه آي چيخميش‌ايدي
بيرمن ايديم، بيرده او كئچميش كوچه‌لر، بير ده خيالين من ايلن
اوچوموز يولداشيديق
تا اورك سيزلادي بيلديم سني خاطيرله‌ييري
يئنه سنله او كئچن گونلريميز ياديما دوشدو
او گؤزل خاطيره‌لر
او شيرين خاطيره‌لر جانيما اود سالدي يئنه
ائله آنديم هله آيريلماميشيق
ائله آنديم كي : محبت آراميزدا هله وار
اولدوم اول عاشيق ـ ديوانه كي ايستردي سني
* * *
خاطيرات دفتريمي آچدي گؤزومده بو كوچه
بو كوچه، ياديما سالدي سني سئومك گونومو
او سئويلمك گونومو
آغاج آلتيندا دانيشماقلاريميز ياديما دوشدو
سن كوسوب، منده باريشماقلاريميز ياديما دوشدو
* * *
آي او گونلر
او محبتلي اوركلر
او گؤزل گيزلي باخيشلار
تله‌سيك نامه وئريب، نامه آلان گونلريميز
او قيزيل گوللريميز
* * *
بو قاپي هر گئجه نازلا آچيلاردي
سورا بير نازلي گؤزل
عشقدن سينه‌سي كؤزلو،
گؤزو سؤزلو،
خيرداجا اللري دوزلو
تاپيلاردي قاپيدا
اوسن ايدين
او سن ايدين كي او گولدن‌ده گؤزل اللريلن
او محبتلي ـ صداقتلي شيرين ديللريلن
بير سالامدان سورا
بير دسته قيزيل گول وئره‌لي
نه محبتله دئيردين :
گؤزله
گوللرده تيكان وار
باتماسين اللرينه
ايندي سن‌سيز بو گئجه
او اوتانجاق منه گول وئرمه‌لرين ياديما دوشدو
* * *
واي كي هيجران نه ياماندير
هئچ بيليرسن نه اوسانديردي مني؟
نئجه يانديردي مني؟
هئچ دوشر يادينا آيا او كئچن گونلريميز
او عزيز خاطيره‌لر
او گؤزل منظره‌لر
وار ياديندا او داريش كوچه‌ده صؤحبتلريميز
آغاج آلتيندا دانيشماقلاريميز
گؤره‌سن بس هارا گئتدي او صداقتلي محبتلريميز؟
* * *
گاه اؤزومله دانيشاندا دئيَرم
كئچي‌نين شنگولوسون قورد آپاران تك
او گؤزل گوللري ده يئللر آپاردي
آلدي هيجران سني مندن
سارامي سئللر آپاردي
سارامي ـ
سئللر ـ
آپاردي
* * *
آي منيله دانيشان منظره‌لر
آي گؤزل لاله‌لي داغلار آي چيچكلي دره‌لر
آي بيزيم خاطيره يولداشلاريميز
آي آغاجلار، قاپيلار
بوش قالان پنجره‌لر ـ
سيز دئيين بير
او محبتله ـ صداقتله اورك باغلامالار
كيم دئيردي آچيلار
كيم دئيردي يانار آتش سؤنه‌جك
بئله دؤوران دؤنه‌جك؟
قاپي نازلا آچيلير
بير گؤزل تابلو آچير خاطيره‌دن گؤزلريمه
باخيرام ديقّتيله
گؤرورَم خيرداجا بير نازلي گؤزل
عشقدن سينه‌سي داغلي
آلاگؤز لاله ياناقلي
خيرداجا اللري مين حسرته باغلي
دايانيبدير قاپي‌يا
سنه بنزير، ولي هئچ سؤيله‌ميري ـ
نامه‌ني باغلاميشام گوللرينه
گؤزله
گوللرده تيكان وار باتماسين اللرينه
غوصّه‌دن گؤز ياشيم اولدوز تك آخير
او گؤزل پرده گؤزومدن ايتيري
اود سالير جانيما بو منظره‌لر
بوش قالان پنجره‌لر
اورگيم غوصّه‌لي بير ساز چاليري
نئجه كي ياپراغا يئل نغمه چالار
بير حزين سس قولاغيمدا دئييري :
سيزين عشقيز، اَمَگيز ديللره دوشدو
چون چوخ ايستكلي ايديز
چوخ صداقتلي ـ محبتلي ايديز
بدنظر باخدي سيزه
آي تيكان‌سيز گولوم آي قار چيچگيم
نه دئييم...
بلكه نظر دَيدي بيزيم عشقيميزه
No comments:
Post a Comment