ALLAH!آللاه آللاه

ALLAH!

  

Bir az istәr ayıla millәti-İran, allah!

Dәsti yorğanı çәkәr başına mollan, allah!

Yatdı nadan, qoyub sәcdәyә başini axund

Dedi: Ey cismimә can, dәrdimә dәrman, allah!

Yaradıbsan mәnә, yarәb, nә hәmәl heyvanlar-

Minmәsi, sürmәsi, yük çatması asan, allah.

Әql verrәm,-deyә vәd etdi bu biәqlә xuda,

Bilmirәm noldu sora, oldu peşiman allah?

Deyisәn: Etmә nәzәr arizi-xubanә tәrәf,

Niyә bәs xәlq olunub bir belә canan, allah?!

Yaradıbsan әlәfi ta edә xurak heyvan,

Xәlq edibsәn gülü hәm iyliyә insan, allah.

Gülşәni-hüsni edib xari-şәriәt qarәt,

Gör nә pis halә qalıb sibi-zәnәxdan, allah!

Şeyxәna, tazә әlifba ilә çox eylәmә cәng,

Düşmәni-din odu, bax, orda, nә sübhan allah!

Gör necә hәmlә edir iğ-bığı biçarәyә bu,

Cәng edir şәst ilә guya, bu komandan, allah!

Kaş sәn dә, üşüyәydin, belә mәxluq kimi,

Ta bilәydin nә çәkir qış günü üryan, allah!

Demirәm bu lütә bir dәst libas eylә әta,

İki arşın şilә ver, eyliyә tuman, allah!

Vermisәn bir aca otuz iki diş-misli-sәdәf:

Olmasa dәn, nәyә lazımdı dәyirman, allah?!

Görsәnir daireyi-ismәti bu acizәnin,

Gülmәyim mәn necә, ey xaliqi-mәnnan, allah!

Fәrci-Hәvvayә baxıb, güldü tamam hurilәr,

Çün soyundurdu onu xazini-rizvan, allah.

Baği-rizvandan ötürdün eşiyә tumançaq,

Kaş Adәm yemәyәydi iki buğdan, allah!

Nә günah sahibidi bu iki yaşında uşaq,

Qarnı ac, paltarı yox, ay sәnә qurban, allah!

Börkü yox, başmağı yox, peykәri üryan, bikәs

Dolanır kuçәvü bazarı pәrişan, allah!

Sәni raziq bilib әkdi bunu biçarә kişi,

Bilmәdi axır acından verәcәk can, allah!

Ey verәn bir sәlavәtә iki min qәsri-tila,

Evin abad ola, ey sahibi-ehsan, allah!

O imarәtlәri sat, tök füqәranin cibinә,

Ver o puldan mәnә dә bir-iki tümәn, allah.

İki buğdan yeyib Adәm neçә min il әvvәl,

Hәlә dә eyliri rüsvay onu Quran allah.

İstәyirdi biri mәsciddә xudadәn yorğan,

Gördüm ağlar, deyәr: "Ey qadiri-mәnnan, allah!"

Dedim: Axmaq kişi, gündә sәnә bir danә lavaş

Verә bilmir, necә versin hәlә yorğan, allah?

Ya gәrәk qoymayasan aduvu rәhmanü, rәhim,

Ya gәrәk eylәyәsәn әdl ilә divan allah!

Balı xәlq eylәmisәn yoxsulu çatdatmaq üçün,

Düzdü bu söz, demirәm mәn sәnә böhtan, allah!

Әlli yaşında Rәhim bal yemәyib bircә kәrә,

İldә yüz yol yeyәr әmma hacı Rәhman, allah!

Möcüzün bari-sitәm qamәtini etdi kәman,

Öldüm axir, yerә gәlsin görüm arxan, allah!

Mirzə əli şəbistərli

آللاه آللاه

بير آز ايسته ر آييلا ميللت-ى ايران آللاه
دستي يورقاني چكر باشينا موللان، آللاه
ياتدي نادان، قويوب سجده يه باشيني آخوند
دئدي: ائي جيسميمه جان، درديمه درمان، آللاه
ياراديبسان منه يارب، نه هميل حئيوانلار
مينمه سي، سورمه سي، يوك چاتماسي آسان، آللاه
وعده ائتدي وئره رم عقل، بو بی عقله خودا
بيلميره م نولدو، سورا اولدو پشيمان آللاه
ديييسن ائتمه نظر عارض-ى خوبانه طرف
نييه بس خلق اولونوب بو گؤزه ل اينسان آللاه؟
ياراديبسان علفی تا ائده خوراک٬ حئيوان
خلق ايديبسن گولو تا اييله يه اينسان٬ آللاه
گولشن-ى حوسنو ائدیب خار-ى شریعت غارت
گؤر نه پیس حاله قالیب سیب-ى زونخدان٬ آللاه
كاش سن ده اوشويه يدين بئله مخلوق كيمي
تا بيله يدين نه چكير قيش گونو عوريان، آللاه
دئميرم بو لوته بير دست ليباس ائيله عطا
ايكي آرشين شيله وئر، ائيله يه توممان آللاه
وئرميسن بو آجا اوتوز ايكي ديش ميثل-ى صدف
اولماسا دن، نه يه لازيمدي دييرمان، آللاه؟
گؤرسه نیر دايیره-يى عيصمتی بو عاجيزه نین
گولمه ییم من نئجه ائی خاليق-ى مننان٬ آللاه
کون-ى حووایه باخیب گولدو تمام حوریلر
چون سویوندوردو اونو خازين-ى ريضوان٬ آللاه
باغ-ى ريضواندان اؤتوردون ائشيیه تومانچاق
کاش آدم یئمیيه یدی ایکی بوغدان آللاه
نه گوناه صاحيبيدي بو ايكي ياشيندا اوشاق؟
قارني آج، پالتاري يوخ، آي سنه قوربان، آللاه
بؤركو يوخ، باشماغي يوخ، پئيكري عوريان، بيكس
دولانير كوچه-و بازاري پريشان، آللاه
سنی رززاق بیلیب اکدی بو  بیچاره کیشی
بیلمه دی آخير آجيندان وئره جک جان٬ آللاه
اي وئره ن بير صلواته ايكي مين قصر-ى طلا
ائوين آباد اولا ائى صاحيب-ى ائحسان آللاه
او عيمارتلري سات٬ تؤك فوقرانين جيبينه
وئر او پولدان، منه ده بير ايكي تومان، آللاه
ایکی بوغدان یيیب آدم ایکی مین ایل اوول
هله ده ائیلیری روسوای اونو قرآن٬ آللاه
ايسته ييردي، بيري مسجيدده خودادان يورقان
گؤردوم آغلار، دييير: ائي قادير-ى منان آللاه!
دئديم، آخماق كيشي گونده سنه بير دانه لاواش
وئره بيلمير، نئجه وئرسين هله يورقان، آللاه؟
يا گره ك قويماياسان آديوي رحمان-و رحيم

يا گره ك ائيله يه سن عدليله ديوان، آللاه
بالي خلق ائيله ميسن يوخسولو، چاتلاتماق اوچون؟
دوزدو بو سؤز، دئميره م من سنه بؤهتان، آللاه
اللي ياشيدي رحيمين، يئمه ييب بير يول بال
ايلده يوز يول يييير آمما، حاجي رحمان، آللاه
مؤعجوزون بار-ى سيتم قامتيني ائتدي كمان
اؤلدوم آخر، يئره گلسين گؤروم آرخان آللاه

میرزه علی شبسترلی