MİLLƏTİM میللتیم

MİLLƏTİM

Niyə bu günə düşdün
Ay mənim məmləkətim?
Özümə düşmən olub
Aşıb-daşan sərvətim.

Bir vaxt sən də xan idin,
Vaxta hökmüran idin,
Dövlətlər quran idin,
İndi sənə nə nə oldu
A qullaşan millətim?

Daşından da zər bitər,
Yeddi arxana yetər.
Dilənçidən beşbetər
Yoxsullaşan millətim.

Namusuyla, arıyla,
Keçdiyi yollarıyla,
Böyük oğullarıyla
Oğullaşan millətim.

Savaş hünərləriylə,
Qəhrəman ərləriylə,
Böyük zəfərləriylə
Nağıllaşan millətim.

Dəmir qıran dişiylə,
İgidlik vərdişiylə,
Öz şanlı keçmişiylə
"Sağollaşan" millətim.

Bu xalqın öz övladı
Öz-özünü ovladı.
Səbrini buxovladı
Səbri daşan millətim.

Necə dözdün bir belə
Müsibətə, müşkülə?
Çəkdiyi sitəm ilə
A yollaşan millətim?

Nə gündəsən, nə gündə?
Qor qalmayıb külündə.
Qeyrətsizlər əlində
Bu gün çaşan millətim.

İstəyirəm çaşmaya,
Dərdiylə yollaşmaya,
Bir daha qullaşmaya
Xan oğlu, xan millətim.

May, 1998 میللتیم

نیه بو گونه دوشدون

آی منیم مملکتیم؟

اؤزومه دوشمن اولوب

آشیب-داشان سروتیم.

بیر واخت سن ده خان ایدین،

واختا هؤکموران ایدین،

دؤولت‌لر قوران ایدین،

ایندی سنه نه نه اولدو

آ قوللاشان میللتیم؟

داشین‌دان دا زر بیتر،

یئددی آرخانا یئتر.

دیلن‌چی‌دن بئشبئتر

یوخسوللاشان میللتیم.

ناموسویلا، آرییلا،

کئچدیگی یوللارییلا،

بؤیوک اوغوللارییلا

اوغوللاشان میللتیم.

ساواش هونرلریله،

قهرمان ارلریله،

بؤیوک زفرلریله

ناغیللاشان میللتیم.

دمیر قیران دیشیله،

ایگیدلیک وردیشیله،

اؤز شان‌لی کئچمیشیله

"ساغوللاشان" میللتیم.

بو خالقین اؤز اؤولادی

اؤز-اؤزونو اوولادی.

صبرینی بوخوولادی

صبری داشان میللتیم.

نئجه دؤزدون بیر بئله

موسیبته، موشکوله؟

چکدیگی سیتم ایله

آ یوللاشان میللتیم؟

نه گونده‌سن، نه گونده؟

قور قالماییب کولونده.

قئیرت‌سیزلر علینده

بو گون چاشان میللتیم.

ایستییرم چاشمایا،

دردیله یوللاشمایا،

بیر داها قوللاشمایا

خان اوغلو، خان میللتیم.

مای، 1998