YADA ABİDƏLƏR UCALDIB DEDİK.. یادا عابده‌لر اوجالدیب دئدیک

YADA ABİDƏLƏR UCALDIB DEDİK..
('416' poemasından.)

...Yada abidələr ucaldıb dedik:
Fəhləlik bizimdir, ustalıq sənin.
Çox zaman özgəyə qulluq elədik
Beyin bizim oldu, əsər özgənin.

Nadir də, Qacar da ölkələr aldı,
Vətən ucalmadı, özü ucaldı,
Öz doğma yurdunu ayağa saldı,
Şahlar bizim oldu, zəfər özgənin.

Saldıq özümüzü özümüz gözdən,
Kül ilə oynadıq əl çəkib közdən.
Ölkələr nur aldı şəfəqimizdən,
Günəş bizim oldu, səhər özgənin.

Mənim sərvətimə cahan göz dikdi,
Sərvətim, dövlətim ona gərəkdi.
Babam yer şumladı, babam yer əkdi,
Əmək bizim oldu, bəhər özgənin.

Açdı sinəsini bizə bu torpaq,
Aləmi bəzəyib lüt olduq ancaq.
Cıdırda çapsaq da hamıdan qabaq,
Hünər bizim oldu, nəmər özgənin,
Qızıl bizim oldu, kəmər özgənin.

1969.

یادا عابده‌لر اوجالدیب دئدیک..

('416 پوئماسین‌دان.)

...یادا عابده‌لر اوجالدیب دئدیک:

فعله‌لیک بیزیم‌دیر، اوستا‌لیق سنین.

چوخ زامان اؤزگه‌یه قوللوق ائیله دیک

بئیین بیزیم اولدو، اثر اؤزگه‌نین.

نادیر ده، قاجار دا اؤلکه‌لر آلدی،

وطن اوجالمادی، اؤزو اوجالدی،

اؤز دوغما یوردونو آیاغا سالدی،

شاه‌لار بیزیم اولدو، ظفر اؤزگه‌نین.

سالدیق اؤزوموزو اؤزوموز گؤزدن،

کول ایله اوینادیق ال چکیب کؤزدن.

اؤلکه‌لر نور آلدی شفقیمیزدن،

گونش بیزیم اولدو، سحر اؤزگه‌نین.

منیم ثروتیمه جاهان گؤز دیکدی،

ثروتیم، دؤولتیم اونا گرکدی.

بابام یئر شوملادی، بابام یئر اکدی،

امک بیزیم اولدو، به هه ر اؤزگه‌نین.

آچدی سینه‌سینی بیزه بو تورپاق،

عالمی بزه‌ییب لوت اولدوق آنجاق.

جیدیردا چاپساق دا هامی‌دان قاباق،

هونر بیزیم اولدو، نمر اؤزگه‌نین،

قیزیل بیزیم اولدو، کمر اؤزگه‌نین.

1969.