Aman Ayrılıq آمان آیری‌لیق

Aman Ayrılıq
(Şəhriyar'ın S. Rüstəmə Yazdığı 1-ci Şe'r)

Bu darıxdıran duman ayrılıq,
Başa sovrulan saman ayrılıq.
Aman ayrılıq, aman ayrılıq,
Aman ayrılıq, aman ayrılıq.

Bir gözün açar, bir gözün yumar,
Arazı sərin gördükdə umar,
Hezer'i dərin gördükdə cumar,
Can dəryasına cuman ayrılıq,
Aman ayrılıq, aman ayrılıq.

Arazım vursun baş daşdan daşa,
Göz yaşı gərək başlardan aşa,
Necə yad olsun qardaş qardaşa,
Nə din qanır, nə iman ayrılıq,
Aman ayrılıq, aman ayrılıq.

Göylərin günün, ayın gizlədir,
Ulduz axdırır, sayın gizlədir,
Oxunu atır, yayın gizlədir,
Qəddimi edip kâman ayrılıq.
Aman ayrılıq, aman ayrılıq.

Ayrılıq gələ, bir kərəm qıla,
Bir neçə gün də bizdən ayrıla,
Qəm də bir biz tək sova-savrula,
Hanı bir belə güman ayrılıq.
Aman ayrılıq, aman ayrılıq.

Dedim ayrılıq, gınama məni,
Səni görmüşəm ellər düşməni,
Yüz min kərrə də sınasam səni,
Haman ayrılıq, haman ayrılıq.
Aman ayrılıq, aman ayrılıq.

Amansız gözün yuman ayrılıq,
Can cızlığından uman ayrılıq,
Nə ğəmli yazar roman ayrılıq,
Dillerə salan duman ayrılıq.
Aman ayrılıg, aman ayrılıq.

Sən unudsan da Süleyman məni,
Unudmuyacaq Şəhriyar səni,
Yaz gələr bülbül gapsar çəməni
İndilik sevsin zaman ayrılıq
Aman ayrılıq, aman ayrılıq.

(21 Noyabr-20 Dekabr 1970)

Ata shehryar

آمان آیری‌لیق

(شهریارین س. روستمه یازدیغی 1-جی شعر)

بو داریخ‌دیران دومان آیری‌لیق،

باشا سوورولان سامان آیری‌لیق.

آمان آیری‌لیق، آمان آیری‌لیق،

آمان آیری‌لیق، آمان آیری‌لیق.

بیر گؤزون آچار، بیر گؤزون یومار،

آرازی سرین گؤردوکده اومار،

هئزئری درین گؤردوکده جومار،

جان دریاسینا جومان آیری‌لیق،

آمان آیری‌لیق، آمان آیری‌لیق.

آرازیم وورسون باش داش‌دان داشا،

گؤز یاشی گرک باش‌لاردان آشا،

نئجه یاد اولسون قارداش قارداشا،

نه دین قانیر، نه ایمان آیری‌لیق،

آمان آیری‌لیق، آمان آیری‌لیق.

گؤی‌لرین گونون، آیین گیزله‌دیر،

اولدوز آخدیریر، سایین گیزله‌دیر،

اوخونو آتیر، یایین گیزله‌دیر،

قددیمی ائدیپ کâمان آیری‌لیق.

آمان آیری‌لیق، آمان آیری‌لیق.

آیری‌لیق گله، بیر کرم قیلا،

بیر نئچه گون ده بیزدن آیریلا،

قم ده بیر بیز تک سووا-ساورولا،

هانی بیر بئله گومان آیری‌لیق.

آمان آیری‌لیق، آمان آیری‌لیق.

دئدیم آیری‌لیق، گیناما منی،

سنی گؤرموشم ائللر دوشمنی،

یوز مین کرره ده سیناسام سنی،

هامان آیری‌لیق، هامان آیری‌لیق.

آمان آیری‌لیق، آمان آیری‌لیق.

آمان‌سیز گؤزون یومان آیری‌لیق،

جان جیزلیغین‌دان اومان آیری‌لیق،

نه غم‌لی یازار رومان آیری‌لیق،

دیللئره سالان دومان آیری‌لیق.

آمان آیریلیگ، آمان آیری‌لیق.

سن اونودسان دا سولئیمان منی،

اونودمویا‌جاق شهریار سنی،

یاز گلر بولبول گاپسار چمنی

ایندی‌لیک سئوسین زامان آیری‌لیق

آمان آیری‌لیق، آمان آیری‌لیق.

(21 نویابر-20 دئکابر 1970)

آتا شئهریار