بهجت آباد خاطره سیBehcət ava xatirəsi

بهجت آباد خاطره سی 

اولدوز ساياراق گوزله ميشم هر گئجه ياری

گج گلمه ده دير يار يئنه اولموش گئجه ياری

گؤزلر آسيلی يوخ نه قارالتی نه ده بير سس

باتميش گولاغيم گؤرنه دؤشور مکده دی داری 

بير قوش آييغام! سويليه رک گاهدان اييلده ر

گاهدان اونودا يئل دئیه لای-لای هوش آپاری 

ياتميش هامی بير آللاه اوياقدير داها بير من

مندن آشاغی کيمسه يوخ اوندان دا يوخاری 

قورخوم بودی يار گلمه يه بيردن ياريلا صبح

باغريم ياريلار صبحوم آچيلما سنی تاری! 

دان اولدوزی ايسته ر چيخا گؤز يالواری چيخما

او چيخماسادا اولدوزومون يوخدی چيخاری

گلمز تانيرام بختيمی ايندی آغارار صبح

قاش بيله آغارديقجا داها باش دا آغاری

عشقين کی قراريندا وفا اولمياجاقميش

بيلمم کی طبيعت نيه قويموش بو قراری؟ 

سانکی خوروزون سون بانی خنجردی سوخولدی

سينه مده أورک وارسا کسيب قیردی داماری

ريشخندله قيرجاندی سحر سويله دی: دورما

جان قورخوسی وار عشقين اوتوزدون بو قماری 

اولدوم قره گون آيريلالی او ساری تئلدن

بونجا قره گونلردی ایدن رنگيمی ساری

گؤز ياشلاری هر يئردن آخارسا منی توشلار

دريايه باخار بللی دی چايلارين آخاری 

از بس منی ياپراق کيمی هيجرانلا سارالديب

باخسان اوزونه سانکی قيزيل گولدی قيزاری

محراب شفقده ئوزومی سجده ده گؤردوم

قان ايچره غميم يوخ اوزوم اولسون سنه ساری 

عشقی واريدی شهريارين گللی- چيچکلی

افسوس قارا يل اسدی خزان اولدی بهاری

آتا شهريار

Behcət ava xatirəsi

Ulduz sayarax gözləmişəm hər gecə yari

Gec gəlmədədir yar yenə olmuş gecə yari

Gözlər asılı yox nə qaraltı nədə bir səs

Batmış qulağım gör nə duşurməkdədi dari

Bir quş “ayığam “söyləyərək gahdan iyildər

Gahdan onuda yel deyə laylay huş apari

Yatmış hamı bir allah oyaxdır daha bir mən

Məndən aşaği kimsə yox ondanda yuxari

Qorxum budi yar gəlməiyə birdən yarıla sübh

Bağrım yarılar sübhüm açılma səni tari

Dan ulduzi istər çıxa göz yalvarı çıxma

O çıxmasada ulduzumun yoxdi çixari

Gəlməz tanıram baxtımı indi ağarar sübh

Qaş boylə ağardıxca daha başda ağari

Eşqin ki qərarında vəfa olmayacağmış

Bilməm ki təbiət niyə qoymuşbu qərari

San ki xoruzun son banı xəncırdi soxuldi

Sinəmdə ürək varsa kəsib qırdi bamari

Rişxəndilə qırcandı səhər soylədi durma

Can qorxusi var eşqin utuzdun bu qumari

Oldum qara gün ayrılalı o sarı teldən

Bunca qara günlərdi edən rəngimi sari

Göz yaşları hər yerdən axarsa məni tuşlar

Dəryayə baxar bəllidi çayların axari

əz bəs məni yaprağ kimi hicranla saraldıb

baxsan üzünə san ki qızıl güldi qızari

mehrab-i şəfəqdə özümi səcdədə gördum

qan içrə qəmim yox üzüm olsa sənə sari

eşqi varıdı ŞƏHRIYARın gülli çiçəkli

əfsus qara yel əsdi xəzan oldi bahari

ŞƏHRIYAR