HARDAN BİLƏSƏN
Hələ eniş-yoxuşlu
Yollar yormayıb səni.
Bir bənövşə namına
Gəzməmisən çəməni,
Özün körpə çiçəksən
Necə duyasan məni,
Hicranın ağrısını
Gorməmisən hələ sən,
Məhəbbətin qədrini
Axı, hardan biləsən.
Sənə xatirə deyil
Düşən yarpaq, solan gül.
Gecələr oyaq qalıb
Gözü yaşla dolan gül.
Dünya hələ sənindir
Oyna, şadla, dolan, gül.
Bu həyatı özgədə
Gorməmisən hələ sən
Məhəbbətin qədrini
Axı, hardan biləsən.
Hər kədəri, hər qəmi
Ürəyə salmamısan,
Bircə kəlmə cavabçün
Nigaran qalmamısan,
Birinə könül verib
İztirab almamısan.
Bu könüllü əzabdan
Xəbərsizsən hələ sən,
Məhəbbətin qədrini
Axı, hardan biləsən.
Nüsrət kəsəmənli
هاردان بیله‌سن
هله ائنیش-یوخوش‌لو
یول‌لار یورماییب سنی.
بیر بنؤوشه نامینا
گزممیسن چمنی،
اؤزون کؤرپه چیچکسن
نئجه دویاسان منی،
هیجرانین آغری‌سینی
گورممیسن هله سن،
محببتین قدرینی
آخی، هاردان بیله‌سن.
سنه خاطره دئییل
دوشن یارپاق، سولان گول.
گئجه‌لر اویاق قالیب
گؤزو یاشلا دولان گول.
دونیا هله سنین‌دیر
اوینا، شادلا، دولان، گول.
بو حیاتی اؤزگه‌ده
گورممیسن هله سن
محببتین قدرینی
آخی، هاردان بیله‌سن.
هر کدری، هر قمی
اوره‌یه سالمامیسان،
بیرجه کلمه جاوابچون
نیگاران قالمامیسان،
بیرینه کؤنول وئریب
ایزتیراب آلمامیسان.
بو کؤنول‌لو ازاب‌دان
خبرسیزسن هله سن،
محببتین قدرینی
آخی، هاردان بیله‌سن.
نصرت کسمنلی
No comments:
Post a Comment